Rownd 2 o’r Gronfa Perchnogaeth Gymunedol yn agor

Meh 30, 2022

Cronfa gwerth £150 miliwn gan lywodraeth y DU yw’r Gronfa Perchnogaeth Gymunedol (COF) sy’n helpu grwpiau cymunedol i ddiogelu, drwy berchnogaeth gymunedol, asedau yn eu hardal leol sydd mewn perygl o fynd yn angof.

Gall grwpiau wneud cais am hyd at £250 mil o arian cyfatebol er mwyn helpu i gymryd yr awenau neu redeg ased, er bod hyd at £1 miliwn ar gael ar gyfer asedau chwaraeon mewn achosion eithriadol.

Cyhoeddodd Llywodraeth y DU brosbectws diweddaraf ar gyfer y Gronfa ddiwedd mis Mai gyda datganiadau o ddiddordeb i’w cyflwyno o 10 Mehefin. Bydd cyfnod rhwng 20 Mehefin a 19 Awst 2022 ar gyfer ceisiadau llawn gan rai sydd wedi llwyddo yn y cam datganiad o ddiddordeb.

Yn y cylch ariannu cyntaf, cafodd tri phrosiect yng Nghymru werth £464,258 o gyllid.

Isod mae’r prif newidiadau o’r rownd gyntaf i fod yn ymwybodol ohonynt:

  • Mae proses ymgeisio dau gam bellach. Mae’r cam datganiad o ddiddordeb (EOI) ar agor bob amser. Bydd ymgeiswyr yn llenwi ffurflen fer (a ddylai gymryd rhwng 10 a 15 munud) i wirio eu cymhwysedd a chael adborth ar gynigion cyn cyflwyno cais llawn.
  • Dim ond ymgeiswyr sy’n llwyddo yn y cam datganiad o ddiddordeb sy’n cael ffurflenni cais llawn
  • Bydd tri chyfnod ymgeisio yn ystod y flwyddyn, a dim ond ar ôl llwyddo yn y cam datganiad o ddiddordeb y gellir cyflwyno ceisiadau.
  • Nod rheolwyr y gronfa yw rhoi adborth ar ddatganiadau o ddiddordeb o fewn tair wythnos
  • Erbyn hyn mae terfyn o ddau gais i bob prosiect
  • Mae’r prosbectws yn cynnwys mwy o fanylion am gymhwysedd ar gyfer asedau chwaraeon ac asedau’r sector cyhoeddus.
  • Mae’r amserlen ar gyfer cwblhau prosiectau wedi’i hymestyn o chwe mis i ddeuddeg mis
  • Prydlesi 25 mlynedd a ffefrir o hyd, ond bydd y gronfa’n caniatáu asedau sydd ag o leiaf bymtheg mlynedd o brydlesi a chymalau terfynu rhesymol yn awr
  • Mae’r gofyniad i brosiectau fod wedi cael defnydd cymunedol yn ystod y 5 mlynedd diwethaf wedi’i ddileu, ond rhaid i asedau ddangos tystiolaeth o ddefnydd cymunedol yn y gorffennol o hyd.

Mae bwriad i gynnig cymorth datblygu yn y dyfodol ac mae Llywodraeth y DU wrthi’n caffael darparwr i gefnogi darpar ymgeiswyr. Rhagwelir y bydd hyn ar waith yn ddiweddarach eleni.

Nid yw’r meini prawf ar gyfer asesu ceisiadau wedi newid.

Cynghorir prosiectau i beidio â rhuthro gyda’u ceisiadau a’u cyflwyno pan fyddant yn barod. Nid yw’r dyddiadau ar gyfer dau gylch arall y flwyddyn ariannol hon wedi’u cadarnhau eto.

Darllen prosbectws COF.